jo sazā chāho mohabbat se do yaaro mujh ko
lekin aḳhlāq ke patthar se na maaro mujh ko
ābshāroñ kī tarah maiñ nahīñ girne vaalā
dhuup kī tarah pahāḌoñ se utāro mujh ko
maiñ to har haal meñ Dūbūñgā magar aḳhlāqan
ye zarūrī hai ki sāhil se pukāro mujh ko
azmat-e-tishna-labī bhuul na jaao logo
phir kisī dasht se ik baar guzāro mujh ko
tum to Duube hue ḳhurshīd ke parvarda ho
tum nahīñ jānte ai chāñd sitāro mujh ko