lams aahaT ke havāoñ ke nishāñ kuchh bhī nahīñ
ḳhvāb hī ḳhvāb hai ye shahr yahāñ kuchh bhī nahīñ
koī guzrī huī shāmoñ meñ kabhī chamkā thā
is ghanī shab ke añdhere meñ ayaañ kuchh bhī nahīñ
chand saa.at ke sitāre haiñ sar-e-bām tulū
din utar jaa.eñ to phir ghar kā samāñ kuchh bhī nahīñ
ik ḳhamoshī hai liye hairat-e-sad-naqsh-o-nigār
varna badle hue mausam kī zabāñ kuchh bhī nahīñ
āsmāñ aaj tirī chhāñv meñ aa baiThī maiñ
ab mire sar pe tirā koh-e-girāñ kuchh bhī nahīñ