saare patthar aur ā.īne ek se lagte haiñ
ek sī hālat rakhne vaale ek se lagte haiñ
yuuñ lagtā hai jaise phir kuchh hone vaalā hai
kuchh hone se pahle lamhe ek se lagte haiñ
pahle koī raah ziyāda lambī lagtī thī
ab to ghar ke sab hī raste ek se lagte haiñ
kaise pahchānūñ maiñ in meñ kaun se haiñ mire log
raat kī āñdhī meñ sab chehre ek se lagte haiñ
kisī kisī ko pyaas bujhāne kā gun aatā hai
varna ye miTTī ke kuuze ek se lagte haiñ
apnī kokh kī garmī meñ hoñ yā us se kuchh duur
maañ ko apne saare bachche ek se lagte haiñ