sabab kyā hai kabhī samjhī nahīñ maiñ

ki TuuTī to bahut bikhrī nahīñ maiñ

rakhī hai guftugū us se har ik pal

suḳhan jis se kabhī rakhtī nahīñ maiñ

ye choT apne hī hāthoñ se lagī hai

kisī ke vaar se zaḳhmī nahīñ maiñ

karūñ kyuuñ yaad tere ḳhāl-o-ḳhad ab

shikasta aa.ine chuntī nahīñ maiñ

ajab thī rahguzar bhī ham-rahī kī

qadam rakh kar kabhī palTī nahīñ maiñ

jo pahuñchī sāhiloñ par tab khulā hai

ki ab vo tishnagī rakhtī nahīñ maiñ