salīqa ishq meñ merā baḌe kamāl kā thā
ki iḳhtiyār bhī dil par ajab misāl kā thā
maiñ apne naqsh banātī thī jis meñ bachpan se
vo ā.īna to kisī aur ḳhat-o-ḳhāl kā thā
rafū maiñ kartī rahī pairahan ko aur idhar
gumāñ use mire zaḳhmoñ ke indimāl kā thā
ye aur baat ki ab chashm-posh ho jaa.e
kabhī to ilm use bhī hamāre haal kā thā
mohabbatoñ meñ maiñ qaa.il thī lab na khulne kī
javāb varna mire paas har savāl kā thā
daraḳht jaḌ se ukhaḌne ke mausamoñ meñ bhī
havā kā pyaar shajar se ajab kamāl kā thā
kitāb kis kī masāfat kī likh rahī hai havā
ye qarz us kī taraf kis ke maah o saal kā thā