aa.e the ghar meñ aag lagāne sharīr log
aur hañs rahe the duur khaḌe be-zamīr log
himmat kahāñ hai mujh meñ ki sach bol kar dikhā.ūñ
baiThe hue haiñ joḌe kamānoñ meñ tiir log
har aadmī ke lab pe hai ik dil-shikan savāl
āḳhir kahāñ chale ga.e vo dil-pazīr log
ik roz kah diyā thā haqīr inkisār meñ
ye baat sach samajh ga.e saare haqīr log
dast-e-talab darāz kareñ bhī to kyā kareñ
dekhe ga.e haiñ dast-nigar dast-gīr log
jo pūchhnā hai pūchh le aur chhoḌ rāsta
Tikte nahīñ kisī bhī jagah ham faqīr log
barpā kiyā gayā thā ġharībī miTāo jashn
shāmil the is meñ shahr ke saare amiir log