tujhe talāsh hai jis kī guzar gayā kab kā
mire vajūd meñ vo shaḳhs mar gayā kab kā
jo mujh meñ rah ke mujhe ā.īna dikhātā thā
mire badan se vo chehra utar gayā kab kā
tilism TuuT gayā shab kā maiñ bhī ghar ko chalūñ
rukā thā jis ke liye vo bhī ghar gayā kab kā
tujhe jo faisla denā hai de bhī munsif-e-vaqt
vo mujh pe saare hī ilzām dhar gayā kab kā
na jaane kaun sā pal TuuT kar bikhar jaa.e
hamāre sabr kā kashkol bhar gayā kab kā