kyā kuchh na kiyā aur haiñ kyā kuchh nahīñ karte

kuchh karte haiñ aisā ba-ḳhudā kuchh nahīñ karte

apne maraz-e-ġham kā hakīm aur koī hai

ham aur tabīboñ kī davā kuchh nahīñ karte

mālūm nahīñ ham se hijāb un ko hai kaisā

auroñ se to vo sharm o hayā kuchh nahīñ karte

go karte haiñ zāhir ko safā ahl-e-kudūrat

par dil ko nahīñ karte safā kuchh nahīñ karte

vo dilbarī ab tak mirī kuchh karte haiñ lekin

tāsīr tire naale dilā kuchh nahīñ karte

dil ham ne diyā thā tujhe ummīd-e-vafā par

tum ham se nahīñ karte vafā kuchh nahīñ karte

karte haiñ vo is tarah 'zafar' dil pe jafā.eñ

zāhir meñ ye jaano ki jafā kuchh nahīñ karte