har taraf ujlī dhanak mausam huā hai barf barf
naddī-nāle hī nahīñ sahrā banā hai barf barf
uḌ rahe haiñ ruuī ke gaale fazāoñ meñ asiir
hai lahū bhī munjamid chehra huā hai barf barf
ik hasīna kī siyah-zulfoñ pe jhālā yuuñ lage
naag kaalā chhag ke jaise pī gayā hai barf barf
muskurānā aise mausam meñ kahāñ āsān hai
hoñT niile paḌ ga.e haiñ is par havā hai barf barf
barf kī chādar hai yā phir barf kā hai regzār
dekhtā huuñ jis taraf aalam huā hai barf barf
jab kabhī 'hassās' barfānī havā tan par lagī
yaad aa.ī gaañv kī aañsū piyā hai barf barf