haqīqatoñ ko fasāna nahīñ banātī maiñ

tumhāre ḳhvāb se ḳhud ko nahīñ jagātī maiñ

vo fāḳhta kī alāmat agar samajh jaatā

to us ke sāmne talvār kyuuñ uThātī maiñ

janāb vāqa.ī maiñ ne kahīñ nahīñ jaanā

vagarna aap kī gaaḌī meñ baiTh jaatī maiñ

phir ek-dam mire pairoñ meñ gir ga.e kuchh log

qarīb thā ki koī faisla sunātī maiñ

ḳhudā kā shukr ki vo rāste se lauT gayā

agar vo aatā to us ko kahāñ biThātī maiñ

kisī ḳhayāl meñ hāthoñ se chhūT jaate haiñ

ye jān-būjh ke bartan nahīñ girātī maiñ

vo dil ho yā mirī guḌiyā kī maut ho jo ho

hamesha sog meñ chūlhā nahīñ jalātī maiñ

maiñ māntī huuñ mirā faisla ġhalat niklā

tumhīñ batāo ki pahle kise bachātī maiñ

mirā badan kisī titlī se kam nahīñ 'zahrā'

to mar na jaatī agar tere haath aatī maiñ