jo bujh ga.e the charāġh phir se jalā rahā hai
ye kaun dil ke kivāḌ phir khaTkhaTā rahā hai
muhīb qahtur-rijāl meñ bhī ḳhayāl terā
na.e manāzir na.e shagūfe khilā rahā hai
vo giit jis meñ tirī kahānī simaT ga.ī thī
use na.ī tarz meñ koī gungunā rahā hai
maiñ vus.atoñ se bichhaḌ ke tanhā na jī sakūñgā
mujhe na roko mujhe samundar bulā rahā hai
vo jis ke dam se maiñ us kī yādoñ se munsalik huuñ
use ye kahnā vo ghaao bhī bhartā jā rahā hai