maut ik darinda hai zindagī balā sī hai
sub.h bhī udāsī hai shaam bhī udāsī hai
apnī intihā par ham shāyad ibtidā meñ haiñ
tab bhī bebasī thī ab bhī be-libāsī hai
bādaloñ ko aanā hai lauT kar isī jānib
ye zamīñ hī pyāsī thī ye zamīñ hī pyāsī hai
ye bhī ek ne.amat hai kaash tum samajh paao
zindagī ke andar jo apne ik ḳhalā sī hai
jāntā to sab kuchh hai vo bhī mere baare meñ
kyā kareñ jo zālim meñ ḳhū-e-nā-shanāsī hai
farq hai to ham meñ hai vaqt ek jaisā hai
san chhiyānve hai ye yā ki san chhiyāsī hai