dasht kī pyaas baḌhāne ke liye aa.e the
abr bhī aag lagāne ke liye aa.e the
aise lagtā hai ki ham hī se koī bhuul huī
tum kisī aur zamāne ke liye aa.e the
apnī pathrā.ī huī āñkhoñ ko jhapkeñ kaise
jo tirā aks churāne ke liye aa.e the
mauj-dar-mauj huā āb-e-ravāñ qaus-e-quzah
taare āñkhoñ meñ nahāne ke liye aa.e the
log kahte hī rahe 'sād' batāo kuchh to
ham ki bas ashk bahāne ke liye aa.e the