chāñd vīrān hai sadiyoñ se mire dil kī tarah

zindagī ġham hai ḳhalā meñ mirī manzil kī tarah

kurra-e-arz hai ik markaz-e-hañgāma-e-shauq

bahr-e-be-āb meñ tahzīb ke sāhil kī tarah

zarra-e-ḳhāk se hai sho.ala-e-jauhar kī numūd

jis ne sūraj ko bhī dekhā hai muqābil kī tarah

kal ke chañgez-o-halākū haiñ pas-e-parda-e-ḳhāk

surḳh-rū the jo kabhī ḳhanjar-e-qātil kī tarah

mere qadmoñ ke nishāñ chāñd pe raḳhshanda haiñ

aap aa jā.iye āvāra-e-manzil kī tarah

girah-e-shām-o-sahar ahl-e-ḳhirad se na khulī

zindagī aaj bhī hai uqda-e-mushkil kī tarah