phir fikr-e-suḳhan maiñ kar rahā huuñ
aflāk se maiñ guzar rahā huuñ
lafzoñ ke khilā rahā huuñ ġhunche
zulmat meñ sitāre bhar rahā huuñ
ye shams-o-qamar haiñ dekhe-bhāle
in sab kā maiñ ham-safar rahā huuñ
miTTī se janam janam kā rishta
dhartī kā siñgār kar rahā huuñ
jannat mirī fikr kī hai me.arāj
dozaḳh se to maiñ guzar rahā huuñ
duniyā ke qasīde maiñ ne likhe
bas apnā hī nauhagar rahā huuñ
sab kī hai ḳhabar 'sarosh' lekin
maiñ ḳhud se hī be-ḳhabar rahā huuñ