jo bhī kahnā ho vahāñ merī zabānī kahnā
log kuchh bhī kaheñ tum aag ko paanī kahnā
aaj vo shaḳhs zamāne meñ hai yaktā kah do
jab koī dūsrā mil jaa.e to saanī kahnā
ġham agar palkoñ pe tham jaa.e to aañsū kahiyo
aur bah jaa.e to maujoñ kī ravānī kahnā
jitnā jī chāhe use aaj haqīqat kah lo
kal use merī tarah tum bhī kahānī kahnā
ab to dhundlā gayā yādoñ kā har ik naqsh 'shamīm'
phir vo de jaa.e koī apnī nishānī kahnā