fikr-e-anjām na āġhāz kā kuchh hosh rahā

chaar din tak to javānī kā ajab josh rahā

maiñ qafas meñ bhī kisī roz na ḳhāmosh rahā

kashmakash meñ bhī tabī.at kā vahī josh rahā

nashsha-e-ulfat-e-sāqī kā ajab josh rahā

haul-e-sahrā-e-qayāmat bhī farāmosh rahā

ġhair hoñ jur.a-e-kash-e-bazm-e-tamannā afsos

ḳhuun ke ghūñT maiñ piitā rahā ḳhāmosh rahā

hech aafat na-rasad gosha-e-tanhā.ī rā

dasht-e-ġhurbat meñ maiñ ye soñch ke rū-posh rahā

mausam-e-gul kī havā dārū-e-be-hoshī thī

sar uThāne kā bhī sabze ko na kuchh hosh rahā

nik.hat-e-gul kī tarah jaame se bāhar hūñgā

fasl-e-gul kā jo gulistāñ meñ yahī josh rahā

bahr-e-rahmat meñ bahut hogā talātum barpā

tujh ko ai ashk-e-nadāmat jo yahī josh rahā

apne sar se bhī kisī roz guzar jā.egā

āb-e-shamshīr ko qātil jo yahī josh rahā

sāya-e-dāman-e-qātil meñ jo niiñd aa.ī mujhe

phir to karvaT bhī badalne kā na kuchh hosh rahā

dhuum suntā rahā ab aate haiñ ab aate haiñ

hashr tak maiñ yūñhī khole hue āġhosh rahā

duur khiñchtī hī ga.ī manzil-e-maqsūd magar

rah-rav-e-ishq kī himmat kā vahī josh rahā

rahmat-e-haq rahī ham āsiyoñ par sāya-fagan

sar pe chhāyā huā ik abr-e-ḳhatā-posh rahā

uThte uThte thī vahī bazm kī mastāna ravish

chalte chalte bhī ḳhum-e-mai ko vahī josh rahā

phir ga.iiñ āñkheñ mirī kūcha-e-jānāñ kī taraf

shukr hai marte dam itnā to mujhe hosh rahā