dāman-e-qātil jo uḌ uḌ kar havā dene lage
kyā batā.ūñ zaḳhm-e-dil kyā kyā duā dene lage
vaa.e nākāmī kahāñ saffāk ne rokā hai haath
zaḳhm-hā-e-shauq jab kuchh kuchh mazā dene lage
chārasāzo mujh se rusvā jāñ-ba-lab bīmār ko
zahr denā chāhiye thā tum davā dene lage
yaas o hirmāñ āh-e-sozāñ ashk-e-ḳhūñ dāġh-e-junūñ
hazrat-e-ishq aur kyā is ke sivā dene lage
aaj ho shāyad kisī ko ātish-e-ġham kī ḳhabar
shukr hai ab ustuḳhvāñ bū-e-vafā dene lage
kyā muḳhālif ho ga.ī ham se zamāne kī havā
'yās' dekho hazrat-e-dil bhī daġhā dene lage