silsila yuuñ bhī ravā rakkhā shanāsā.ī kā
koī rishta to rahe aañkh se bīnā.ī kā
tabsira ḳhuub yahāñ tiir kī raftār pe hai
tazkira kaun kare zaḳhm kī gahrā.ī kā
mohtaram kah ke mujhe us ne pashemān kiyā
koī pahlū na milā jab mirī rusvā.ī kā
tañg aa kar tirī yādoñ ko pare jhaTkā hai
marsiya kaun paḌhe roz kī tanhā.ī kā
apne zaḳhmoñ se gila hai mujhe itnā 'az.har'
maiñ ne ehsān uThā rakkhā hai purvā.ī kā