gard-e-safar meñ raah ne dekhā nahīñ mujhe
ik umr mahr o maah ne dekhā nahīñ mujhe
achchhā huā ki ḳhāk-nashīnoñ ke rū-ba-rū
us shahr-e-kaj-kulāh ne dekhā nahīñ mujhe
maiñ dekhtā thā rañg badaltī huī nigāh
badlī huī nigāh ne dekhā nahīñ mujhe
merī sadā vahāñ pe tujhe kaise DhūñDtī
terī jahāñ panāh ne dekhā nahīñ mujhe
har mauj-e-dard ḳhud maiñ utāre chalā gayā
'sāhil' dil-e-tabāh ne dekhā nahīñ mujhe