kisī kī muntazir ab dil kī rah-guzār nahīñ
magar mujhe to kisī tarah bhī qarār nahīñ
gulāb kaise khile dasht-e-ārzū meñ koī
ye sar-zamīn abhī vāqif-e-bahār nahīñ
simaT gayā thā mire bāzuoñ meñ raat ga.e
ye āsmān mirī tarah be-kanār nahīñ
tirī nazar ne khilā.e mirī nazar meñ gulāb
ḳhud apne aap pe mausam ko iḳhtiyār nahīñ
lahūluhān mirī uñgliyāñ ye kahtī thiiñ
kisī chaTān meñ ab koī ābshār nahīñ