na.ī bahār kā thā muntazir chaman merā
jo us kā lams milā khil uThā badan merā
ḳhabar nahīñ mirī tanhā.iyoñ meñ raat ga.e
na jaane kaun bhigotā hai pairahan merā
mire vajūd ko chhū le mujhe mukammal kar
tire baġhair adhūrā hai bāñkpan merā
har ik mahāz pe mujh ko shikast dī us ne
agarche chār-sū lashkar thā ḳhema-zan merā
ab us ke sāmne jā.ūñ to ḳhaak uḌtī hai
vo din ga.e ki thā ā.īna ham-suḳhan merā