ġham na kar ġham kī siyah raat badal saktī hai

jo bhī ho sūrat-e-hālāt badal saktī hai

va.ada-e-vasl pe maiñ ḳhush to huā huuñ lekin

ye bhī ḳhadsha hai ki vo baat badal saktī hai

maiñ tire naaz uThāne pe razā-mand magar

tū mire vāste ādāt badal saktī hai

maiñ ne maanā mirī vaq.at nahīñ kuchh bhī lekin

tū jo mil jaa.e to auqāt badal saktī hai

maiñ tujhe dil meñ basā luuñ magar itnā to batā

tū ḳhushī meñ mire sadmāt badal saktī hai

is liye bhī maiñ rivāyāt kā qaa.il na huā

ye hai duniyā ye rivāyāt badal saktī hai