shām-e-firāq apnī farozāñ na kar sake
tārīk zindagī ko daraḳhshāñ na kar sake
the is qadar judā.ī ke lamhāt sogvār
kuchh bhī talāfī-e-ġham-e-hijrāñ na kar sake
yūrish ġhamoñ kī aisī thī mujh pe ki al-amāñ
kuchh rāzdārī-e-ġham-e-pinhāñ na kar sake
thī is qadar navāzish-e-paiham ki al-hafīz
kuchh ehtimām-e-vus.at-e-dāmāñ na kar sake
apnī hī zindagī thī kuchh aisī ḳhizāñ-nasīb
tum bhī hamāre dard kā darmāñ na kar sake