kisī taḳhlīq ke paikar meñ aanā chāhtā huuñ
tasavvur huuñ kahīñ apnā Thikāna chāhtā huuñ
mujhe tahsīn kī jab koī ḳhvāhish hī nahīñ hai
to apne sher kyuuñ tujh ko sunānā chāhtā huuñ
mujhe tujh se shikāyat bhī hai lekin ye bhī sach hai
tujhe ai zindagī maiñ vālihāna chāhtā huuñ
isī ḳhātir to ye sinf-e-suḳhan maiñ ne chunī hai
ki jo mahsūs kartā huuñ batānā chāhtā huuñ
mire in ḳhushk hoñToñ ko zarā namnāk kar de
maiñ apnī pyaas kī shiddat chhupānā chāhtā huuñ
tabhī to 'shād' palkoñ par sajā rakkhā hai un ko
maiñ apne ḳhvāb duniyā ko dikhānā chāhtā huuñ