vo chilman se bijlī girānā tumhārā
mujhe yaad hai muskurānā tumhārā
vo jaanā palaT kar na aanā tumhārā
na bhūlegā ye dil bahāna tumhārā
ayaañ ho gayā rāz-e-dil ahl-e-dil par
vo sharmā ke nazreñ jhukānā tumhārā
banā do ki chāhe miTā do kisī ko
ḳhudā.ī tumhārī zamāna tumhārā
kamāñ se nikal jo mire dil meñ aayā
vo tīr-e-nazar kā nishāna tumhārā
kalīsā meñ dair-o-haram meñ bhī DhūñDhā
na paayā kahīñ bhī Thikāna tumhārā
yaqīnan tumheñ yaad aatā to hogā
vo 'sāgar' vo āshiq dīvāna tumhārā