bahut udaas hai dil jaane mājrā kyā hai
mire nasīb meñ ġham ke sivā dharā kyā hai
maiñ jin ke vāste duniyā hī chhoḌ aayā thā
vo pūchhte haiñ ki āḳhir tujhe huā kyā hai
nibhā rahā huuñ maiñ duniyā ke rāh-o-rasm yahāñ
vagarna jism ke sahrā meñ ab bachā kyā hai
yahāñ to iid kā mausam bhī ab nahīñ aatā
na jaane gardish-e-daurāñ ko ho gayā kyā hai
har ek raat mirī zindagī kā mātam hai
har ek shaam yahāñ maut ke sivā kyā hai
hamārā farz to jalnā hai sirf mahfil meñ
bhalā charāġh kā ḳhushiyoñ se vāsta kiyā hai