kyuuñ dil hai be-qarār mujhe kuchh pata nahīñ
kis kā hai intizār mujhe kuchh pata nahīñ
bas ho gayā hai jaan se pyārā koī mujhe
kahte haiñ kis ko pyaar mujhe kuchh pata nahīñ
duniyā meñ kyā huuñ kaun huuñ kyā naam hai mirā
mat pūchh baar baar mujhe kuchh pata nahīñ
pesh-e-nigāh aag kā dariyā hai duur tak
hai kaun sā dayār mujhe kuchh pata nahīñ
dushman hai kaun faisla ho hī nahīñ rahā
hai kaun ġham-gusār mujhe kuchh pata nahīñ
maiñ ne sadā ḳhizāoñ se rakkhī hai dostī
hotī hai kyā bahār mujhe kuchh pata nahīñ