zinda rahne kī aas hai ik shaḳhs
mujh ko jīvan meñ raas hai ik shaḳhs
ek muddat se duur hai lekin
phir bhī is dil ke paas hai ik shaḳhs
varna maiñ kab kī mar ga.ī hotī
zindagī kī asaas hai ik shaḳhs
us ke bin maiñ to maiñ nahīñ rahtī
kyā mire tan kā maas hai ik shaḳhs
mere dil kī umañg jāntā hai
kis qadar ḳhud-shanās hai ik shaḳhs
us meñ utnā hī mel mumkin hai
jis qadar ḳhush-libās hai ik shaḳhs