zarā sī der jo ḳhauf-e-davām ḳhatm huā

ye mat samajh ki ye hū kā maqām ḳhatm huā

kahāñ gayā jaras-e-karbalā bulā ke mujhe

ki rāste meñ mirā ghar tamām ḳhatm huā

na terī pyaas ne dariyāoñ se hī bai.at kī

na pāniyoñ pe likhā terā naam ḳhatm huā

daraḳht saare sameTe hue haiñ shāḳh-e-ḳhulūs

chalo ki pahle safar kā qayām ḳhatm huā

chunegā soḳhta ḳhemoñ kī raakh aur koī

lagā ke aag havā kā to kaam ḳhatm huā

sar-e-ufuq koī taarā na be-navā koī chīḳh

ye kin tabāhiyoñ pe rañj-shām ḳhatm huā