kanār-e-āb havā jab bhī sansanātī hai
nadī meñ chupke se ik chīḳh Duub jaatī hai
dikhā.ī detī haiñ lāsheñ hī lāsheñ āñgan meñ
kahāñ se ḳhud-kushī kar ke ye dhuup aatī hai
vo shai jo baiThtī hai chhup ke nañge peḌoñ meñ
guzarte vaqt bahut tāliyāñ bajātī hai
piyūñ sharāb maiñ dushman ke kāsa-e-sar meñ
ye buzdil aarzū kaisī hañsī uḌātī hai
'musavvir' us ko batāte haiñ zāniya ye log
kueñ meñ apnī jo sab nekiyāñ girātī hai