kaḌe haiñ kos safar duur kā zarūrī hai
gharoñ se rishtoñ kā ab ḳhātma zarūrī hai
parastish apnī anā ke butoñ kī kar lī bahut
sukūn-e-dil ke liye ik ḳhudā zarūrī hai
kahīñ to thoḌī sī gunjā.ish-e-ḳhulūs mile
diloñ meñ chhup ke yahāñ jhāñknā zarūrī hai
maiñ sañg-e-rah huuñ to Thokar kī zad pe ā.ūñgā
tum ā.īna ho to phir TūTnā zarūrī hai
na socho tark-e-ta.alluq ke moḌ par ruk kar
qadam baḌhāo ki ye hādsa zarūrī hai
tamām safhe sabhī goshvāre jab tere
hamārā karb kitāboñ meñ kyā zarūrī hai