kahāñ rahī hai mohabbat kī aas shahroñ meñ
badal liye haiñ sabhī ne libās shahroñ meñ
sagān-e-tishna har ik rahguzar pe baiThe haiñ
rahā nahīñ hai ab insāñ kā paas shahroñ meñ
masīhī ḳhuuñ ho ki shii.a ho ahmadī sunnī
lahū kī baḌhtī hī jaatī hai pyaas shahroñ meñ
lahū ke āḳhirī qatre bhī be-jazā Thahre
kahāñ se ā.eñge ab haq-shanās shahroñ meñ
kanār-e-shahr dukhoñ ki ridā meñ lipTī hoī
sisak rahī hai ujāloñ kī aas shahroñ meñ