use to ḳhvāb kisī aur ke suhāne lage
hamāre dil se nikalte jise zamāne lage
hamāre dil meñ na.e ḳhauf sar uThāne lage
parinde jab bhī kahīñ ghoñsle banāne lage
jinheñ panāh dī ham ne vahī bachā ke nazar
hamāre ghar meñ na.e rāste banāne lage
hamārī kam-nigahī pe vo ḳhud bhī hairāñ thā
ham apnā jaan ke jis ko gale lagāne lage
har ek chehra khilā hai gulāb kī sūrat
ye kaise rañg na.e bārishoñ meñ aane lage