ḳhud ko itnā jo havā-dār samajh rakkhā hai
kyā hameñ ret kī dīvār samajh rakkhā hai
ham ne kirdār ko kapḌoñ kī tarah pahnā hai
tum ne kapḌoñ hī ko kirdār samajh rakkhā hai
merī sanjīda tabī.at pe bhī shak hai sab ko
baaz logoñ ne to bīmār samajh rakkhā hai
us ko ḳhud-dārī kā kyā paaTh paḌhāyā jaa.e
bhiik ko jis ne purus-kār samajh rakkhā hai
tū kisī din kahīñ be-maut na maarā jaa.e
tū ne yāroñ ko madad-gār samajh rakkhā hai