baḌe hisāb se izzat bachānī paḌtī hai
hamesha jhūTī kahānī sunānī paḌtī hai
tum ek baar jo TuuTe to juḌ nahīñ paa.e
hameñ to roz ye zillat uThānī paḌtī hai
mujhe ḳharīdne aise bhī log aate haiñ
ki jin ke kahne se qīmat ghaTānī paḌtī hai
malāl ye hai ki ye donoñ haath mere haiñ
kisī kī chiiz kisī se chhupānī paḌtī hai
tum apnā naam batā kar hī chhūT jaate ho
hameñ to zaat bhī apnī batānī paḌtī hai