hamāre dostoñ meñ koī dushman ho bhī saktā hai
ye añgrezī davā.eñ haiñ reaction ho bhī saktā hai
kisī māthe pe har dam ek hī label nahīñ rahtā
bhikārī chand haftoñ meñ mahājan ho bhī saktā hai
siyāsat naqlī noToñ kī tarah dhoke se chaltī hai
jise rahbar samajhte ho vo rahzan ho bhī saktā hai
mire bachchoñ kahāñ tak baap ke kāñdhoñ pe baiThoge
kisī din fail us gaaḌī kā engine ho bhī saktā hai
kabhī chashma haTā kar dekh āñkhoñ se ta.assub kā
tire dāman se ujlā merā dāman ho bhī saktā hai