andarūñ niiñd kā ik ḳhālī makāñ hotā thā
merī āñkhoñ meñ tirā ḳhvāb nihāñ hotā thā
roz jaate the bahut duur talak ham donoñ
par ye ma.alūm nahīñ hai maiñ kahāñ hotā thā
dasht ke paar bahut duur thī ik ābādī
aur us samt bahut gahrā dhuāñ hotā thā
ḳhauf ke ba.ad bhī vahshat hī nazar aatī thī
vahshatoñ se bhī pare koī jahāñ hotā thā
maiñ kahānī se bahut duur nikal aayā thā
merā kirdār kahīñ aur bayāñ hotā thā