uTh rahā hai dam-ba-dam Dar kā dhuāñ
kam nahīñ ho pā rahā ghar kā dhuāñ
kashtiyoñ kī aag dafnāne ke ba.ad
dekh le sāhil samundar kā dhuāñ
donoñ jānib ek jaisī aag hai
donoñ jānib hai barābar kā dhuāñ
sāmne to scene hai behtar magar
kyā pata pīchhe ho manzar kā dhuāñ
khiḌkiyāñ saarī kī saarī khol kar
dekhtā rahtā huuñ bāhar kā dhuāñ
jañg ke āsār haiñ baaqī abhī
aa rahā hai paas lashkar kā dhuāñ