mujh ko itnā to yaqīñ hai maiñ huuñ
aur jab tak ye zamīñ hai maiñ huuñ
is se aage maiñ kahāñ tak sochūñ
aadmī jitnā zahīñ hai maiñ huuñ
ye jise saath liye phirtā huuñ
ye koī aur nahīñ hai maiñ huuñ
ek chhoTā sā mahal sapnoñ kā
jis meñ ik māh-jabīñ hai maiñ huuñ
ghar ke bāhar hai koī mujh jaisā
aur jo ghar meñ makīñ hai maiñ huuñ
mere malbe pe khaḌe haiñ sab log
dekhtā koī nahīñ hai maiñ huuñ