vo mauj-e-havā jo abhī bahne kī nahīñ hai

ham jānte haiñ aap se kahne kī nahīñ hai

yuuñ ḳhush na ho ai shahr-e-nigārāñ ke dar o baam

ye vādi-e-saffāk bhī rahne kī nahīñ hai

ai kaash koī koh-e-nidā hī se pukāre

dīvār-e-sukūt aap hī Dhahne kī nahīñ hai

kyuuñ aks-e-gurezāñ se chamak bujh ga.ī dil kī

ye raat to mahtāb ke gahne kī nahīñ hai

raqqāsa-e-sahrā-e-junūñ bhī hai yahī mauj

yak chashma-e-ḳhūñ-nāb se bahne kī nahīñ hai

ik tarfa tamāshā hai mujhe shoḳhi-e-guftār

āshuftagi-e-'mīr' bhī sahne kī nahīñ hai