baat karnā hai karo sāmne itrāo nahīñ
jo nahīñ jānte us baat ko samjhāo nahīñ
maiñ vo samjhā huuñ bayāñ tum se jo hogā na kabhī
be-zarar huuñ mire is kashf se ghabrāo nahīñ
is tarannum meñ to mafhūm nahīñ hai koī
sher kahte ho to paḌh Daalo magar gaao nahīñ
band āñkhoñ meñ bikhar jaate haiñ bajte hue rañg
mujh se andhe ko koī ā.īna dikhlāo nahīñ
maiñ ikaa.ī kī tarah sab meñ samāyā 'mājid'
baat baḌh jā.egī ādād ko ginvāo nahīñ