samajhte haiñ jo kamtar har kisī ko
vo samjheñ to sahī apnī kamī ko
jahāñ meñ juz ġham-o-ranj-o-musībat
milā bhī hai azīzo kuchh kisī ko
kaheñ bhī to kaheñ ab kyā kisī se
sunā.eñ to sunā.eñ kyā kisī ko
haqīqat meñ nahīñ bante kisī ke
banāte haiñ jo apnā har kisī ko
na pā-e-raftan ab ne jā-e-ma.adin
kahāñ tak ro.eñ apnī bebasī ko
ta.ajjub hai samajhne par bhī sab kuchh
na samjhā aadmī ne aadmī ko
ziyā-e-hazrat-e-'anvar' ne 'rif.at'
jilā baḳhshī hai merī shā.irī ko