hai shor sāhiloñ par sailāb aa rahā hai
ā.ankhoñ ko ġharq karne phir ḳhvāb aa rahā hai
bas ek jism de kar ruḳhsat kiyā thā us ne
aur ye kahā thā baaqī asbāb aa rahā hai
ḳhāk-e-visāl kyā kyā sūrat badal rahī hai
sūraj guzar chukā hai mahtāb aa rahā hai
paanī ke aa.ine meñ kyā aañkh paḌ ga.ī hai
dariyā meñ kaisā kaisā girdāb aa rahā hai
ā.ankhoñ kī pyāliyoñ meñ bārish machī huī hai
sahrā meñ koī manzar shādāb aa rahā hai