huī ik ḳhvāb se shādī mirī tanhā.ī kī
pahlī beTī hai udāsī mirī tanhā.ī kī
abhī ma.alūm nahīñ kitne haiñ zaatī asbāb
kitnī vaj.heñ haiñ samājī mirī tanhā.ī kī
jā ke dekhā to khulā raunaq-e-bāzār kā raaz
ek ik chiiz banī thī mirī tanhā.ī kī
shahr-dar-shahr jo ye anjuman.en haiñ ābād
tarbiyat-gāheñ haiñ saarī mirī tanhā.ī kī
sirf ā.īna-e-āġhosh-e-mohabbat meñ milī
ek tanhā.ī javābī mirī tanhā.ī kī
saaf hai chehra-e-qātil mirī āñkhoñ meñ magar
mo'atabar kab hai gavāhī mirī tanhā.ī kī
hāsil-e-vasl sifar hijr kā hāsil bhī sifar
jaane kaisī hai riyāzī mirī tanhā.ī kī
kisī hālat meñ bhī tanhā nahīñ hone detī
hai yahī ek ḳharābī mirī tanhā.ī kī
maiñ jo yuuñ phirtā huuñ mai-ḳhānoñ meñ but-ḳhānoñ meñ
hai yahī roza namāzī mirī tanhā.ī kī
'farhat-ehsās' vo ham-zād hai merā jis ne
shahr meñ dhuum machā dī mirī tanhā.ī kī