bahut sī āñkheñ lagīñ haiñ aur ek ḳhvāb tayyār ho rahā hai

haqīqatoñ se muqāble kā nisāb tayyār ho rahā hai

tamām duniyā ke zaḳhm apne bayāñ qalam-band kar rahe haiñ

mirī savāneh-hayāt kā ek baab tayyār ho rahā hai

bahut se chāñd aur bahut se phuul ek tajrabe meñ lage haiñ kab se

sunā hai tum ne kahīñ tumhārā javāb tayyār ho rahā hai

chaman ke phūloñ meñ ḳhuun dene kī ek tahrīk chal rahī hai

aur is lahū se ḳhizāñ kī ḳhātir ḳhizāb tayyār ho rahā hai

purānī bastī kī khiḌkiyoñ se maiñ dekhtā huuñ to sochtā huuñ

nayā jo vo shahr hai bahut hī ḳharāb tayyār ho rahā hai

khule hue haiñ fanā ke daftar meñ sab anāsir ke goshvāre

ki āsmānoñ meñ ab zamīñ kā hisāb tayyār ho rahā hai

maiñ jab kabhī us se pūchhtā huuñ ki yaar marham kahāñ hai merā

to vaqt kahtā hai muskurā kar janāb tayyār ho rahā hai

badan ko jaanā hai pahlī baar aaj ruuh kī mahfil-e-tarab meñ

to aisā lagtā hai jaise koī navāb tayyār ho rahā hai

is imtihāñ ke savāl aate nahīñ nisāboñ se maktaboñ ke

ajiib āshiq hai ye jo paḌh kar kitāb tayyār ho rahā hai

junūñ ne barpā kiyā hai sahrā meñ shahr kī ta.aziyat kā jalsa

to 'farhat-ehsās' bhī ba-chashm-e-pur-āb tayyār ho rahā hai