pahle to zarā sā haT ke dekhā

us shoḳh se phir lipaT ke dekhā

itnī bhī burī na thī jo maiñ ne

duniyā ko zarā sā haT ke dekhā

dekhā use us kā ho ke aur phir

kyā farq paḌegā kaT ke dekhā

ham jam.a hue hī jā rahe the

ārām milā jo ghaT ke dekhā

vo aur qarīb aa gayā thā

jab maiñ ne zarā simaT ke dekhā

phir dil ne mire ġham aur ḳhushī ko

rassī kī tarah se baT ke dekhā

kal Duub rahā thā 'farhat-ehsās'

ham ne bhī tamāshā DaT ke dekhā