ḳhat bahut us ke paḌhe haiñ kabhī dekhā nahīñ hai

kyā mire parda-nashīñ kā koī chehrā nahīñ hai

shahr itnā bhī na kar zulm ki zid par aa jā.ūñ

merā sahrā se ta.alluq abhī TuuTā nahīñ hai

kyā dikhātā hai mire naam pe ā.īna-e-shahr

muddatoñ se mirā apnā koī chehra nahīñ hai

jism kī pyaas ko hūroñ kī bashārat pe na Taal

ye hamārā dil-e-sāda koī bachcha nahīñ hai

kuchh nahīñ tishnagī-e-dīda-e-bīnā kā ilaaj

ḳhvāb tak meñ bhī koī sūrat-e-dariyā nahīñ hai

kab mujhe tujh se mohabbat hai urūs-e-duniyā

azdavājī sā ye rishta koī rishta nahīñ hai

'farhat-ehsās' nayā chāhiye us ko har raat

magar afsos ki us sā koī paidā nahīñ hai