hameñ jab apnā ta.āruf karānā paḌtā hai
na jaane kitne dukhoñ ko dabānā paḌtā hai
bahut se hañste huoñ ko lagā ke rone par
bahut se rote ho.uuñ ko hañsānā paḌtā hai
kisī ko niiñd na aatī ho raushnī meñ agar
to ḳhud charāġh-e-mohabbat bujhānā paḌtā hai
kisī ke qurb kī ḳhvāhish meñ yuuñ bhī hotā hai
ki umr-bhar ke liye duur jaanā paḌtā hai
ġhazāl-e-husn ko ghar chāhiye par us ke liye
ḳhud apne aap ko sahrā banānā paḌtā hai
tum is taraf se jo guzro to itnā yaad rahe
ki is navāh meñ ham sā divāna paḌtā hai
kisī sadā pe bhī jaate nahīñ miyāñ 'ehsās'
par āñsuoñ ke bulāve pe jaanā paḌtā hai
ab aa rahā ho koī husn us tasavvuf se
to ham ko halqa-e-bai.at baḌhānā paḌtā hai
ḳhudā hai qādir-e-mutlaq ye baat khultī hai tab
jab us se kaam koī kāfirāna paḌtā hai
bahut ziyāda haiñ ḳhatre badan kī mahfil meñ
par apnī ek hī mahfil hai jaanā paḌtā hai
hamāre paas yahī shā.irī kā sikka hai
ulaT-palaT ke isī ko chalānā paḌtā hai
ajiib tarz-e-taġhazzul hai ye miyāñ 'ehsās'
ki jism-o-rūh ko ik saath gaanā paḌtā hai