Thokareñ khā ke sambhalnā nahīñ aatā hai mujhe

chal mire saath ki chalnā nahīñ aatā hai mujhe

apnī āñkhoñ se bahā de koī mere aañsū

apnī āñkhoñ se nikalnā nahīñ aatā hai mujhe

ab tirī garmi-e-āġhosh hī tadbīr kare

mom ho kar bhī pighalnā nahīñ aatā hai mujhe

shaam kar detā hai aksar koī zulfoñ vaalā

varna vo din huuñ ki Dhalnā nahīñ aatā hai mujhe

kitne dil toḌ chukā huuñ isī be-hunarī se

jaal meñ phañs ke nikalnā nahīñ aatā hai mujhe

beach dariyā ke maiñ dariyā to badal saktā huuñ

apnī kashtī ko badalnā nahīñ aatā hai mujhe

apne ma.anī ko badalnā to mujhe aatā hai

in ke lafzoñ ko badalnā nahīñ aatā hai mujhe

'farhat-ehsās' taraqqī nahīñ karnī mujh ko

itnī raftār se chalnā nahīñ aatā hai mujhe